NEET ଆନ୍ଦୋଳନକାରୀଙ୍କୁ ବଡ଼ ଆଶ୍ୱସ୍ତି: ମାମଲା ପ୍ରତ୍ୟାହାର, ଗିରଫ ବ୍ୟକ୍ତିଙ୍କୁ ଶୀଘ୍ର ମୁକ୍ତି ପାଟନା: NEET ପରୀକ୍ଷାକୁ କେନ୍ଦ୍ର କରି ହୋଇଥିବା ଆନ୍ଦୋଳନରେ ସାମିଲ ହୋଇଥିବା ଲୋକଙ୍କୁ ବିହାର ସରକାର ବଡ଼ ଆଶ୍ୱସ୍ତି ଦେଇଛନ୍ତି। ଗୃହ ବିଭାଗ ପକ୍ଷରୁ ଜାରି ସାର୍ବଜନୀନ ବିଜ୍ଞପ୍ତି ଅନୁଯାୟୀ, ୨୬ ଜୁଲାଇ ସନ୍ଧ୍ୟା ୬ଟା ସୁଦ୍ଧା ରାଜ୍ୟର ଯେକୌଣସି ସ୍ଥାନରେ ହୋଇଥିବା ଆନ୍ଦୋଳନରେ ଭାଗ ନେଇଥିବା କୌଣସି ବ୍ୟକ୍ତିଙ୍କ ବିରୋଧରେ ଦଣ୍ଡାତ୍ମକ, ପ୍ରତିଶୋଧମୂଳକ କିମ୍ବା ଅନ୍ୟ କୌଣସି ପ୍ରତିକୂଳ ଆଇନଗତ ପଦକ୍ଷେପ ନିଆଯିବ ନାହିଁ। ଏହି ସମୟ ମଧ୍ୟରେ ରୁଜୁ ହୋଇଥିବା ସମସ୍ତ FIR, ଅଭିଯୋଗ ଏବଂ କାରଣ ଦର୍ଶାଅ ନୋଟିସ୍ ପ୍ରତ୍ୟାହାର ପାଇଁ ତୁରନ୍ତ ଆଇନଗତ ପ୍ରକ୍ରିୟା ଆରମ୍ଭ କରାଯିବ। ଏହାସହ ଏହି ମାମଲାରେ ଗିରଫ କିମ୍ବା ଅଟକ ରଖାଯାଇଥିବା ସମସ୍ତଙ୍କୁ ଯଥାଶୀଘ୍ର ମୁକ୍ତ କରାଯିବ ବୋଲି ସରକାର ଘୋଷଣା କରିଛନ୍ତି। ସରକାର ସ୍ପଷ୍ଟ କରିଛନ୍ତି ଯେ, ଏହି ମାମଲାରେ ନାମ ଥିବା ବ୍ୟକ୍ତିମାନଙ୍କ ବିରୋଧରେ ଭବିଷ୍ୟତରେ ପ୍ରତ୍ୟକ୍ଷ କିମ୍ବା ପରୋକ୍ଷ ଭାବେ କୌଣସି କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯିବ ନାହିଁ।