ଉତ୍ତରାଖଣ୍ଡରେ ପ୍ରବଳ ବର୍ଷା ସତର୍କତା; ଆଜି ସ୍କୁଲ ଓ ଅଙ୍ଗନୱାଡ଼ି କେନ୍ଦ୍ର ବନ୍ଦ ଦେହରାଦୁନ: ଉତ୍ତରାଖଣ୍ଡର ବିଭିନ୍ନ ଜିଲ୍ଲାରେ ଆଜି ପ୍ରବଳରୁ ଅତି ପ୍ରବଳ ବର୍ଷାର ସମ୍ଭାବନା ଥିବାରୁ ପାଣିପାଗ ବିଭାଗ ସତର୍କ ସୂଚନା ଜାରି କରିଛି। ଗତ ରାତିଠାରୁ ଲଗାତାର ବର୍ଷା ଯୋଗୁଁ ରାଜ୍ୟର ଅନେକ ସ୍ଥାନରେ ସଡ଼କ ଯୋଗାଯୋଗ ବାଧାପ୍ରାପ୍ତ ହୋଇଛି। ପାଣିପାଗ ବିଭାଗ ଅନୁଯାୟୀ, ଉତ୍ତରକାଶୀ, ଦେହରାଦୁନ, ଟେହ୍ରି, ରୁଦ୍ରପ୍ରୟାଗ, ଚାମୋଲି, ଉଧମ ସିଂହ ନଗର, ବାଗେଶ୍ୱର, ପିଥୋରାଗଡ଼ ଏବଂ ନୈନିତାଲ ଜିଲ୍ଲାର କେତେକ ସ୍ଥାନରେ ବଜ୍ରପାତ ସହ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ରାଜ୍ୟର ଅନ୍ୟ ଜିଲ୍ଲାଗୁଡ଼ିକରେ ମଧ୍ୟ ବଜ୍ରପାତ ସହ ପ୍ରବଳ ବର୍ଷା ହୋଇପାରେ। ପାଣିପାଗ ସତର୍କତାକୁ ଦୃଷ୍ଟିରେ ରଖି ଦେହରାଦୁନ, ପୌରୀ, ରୁଦ୍ରପ୍ରୟାଗ, ପିଥୋରାଗଡ଼, ଚାମୋଲି ଏବଂ ବାଗେଶ୍ୱର ଜିଲ୍ଲାର ସମସ୍ତ ସ୍କୁଲ ଓ ଅଙ୍ଗନୱାଡ଼ି କେନ୍ଦ୍ର ଆଜି ପାଇଁ ବନ୍ଦ ଘୋଷଣା କରାଯାଇଛି। ଲଗାତାର ବର୍ଷା ଯୋଗୁଁ ପାହାଡ଼ିଆ ଅଞ୍ଚଳର ନଦୀ ଓ ଝରଣାଗୁଡ଼ିକର ଜଳସ୍ତର ବୃଦ୍ଧି ପାଇଛି। ପ୍ରାୟ ୫୦ଟି ଗ୍ରାମୀଣ ସଡ଼କ ବନ୍ଦ ରହିଥିବାବେଳେ ସେଗୁଡ଼ିକୁ ପୁନଃ ଚଳାଚଳଯୋଗ୍ୟ କରିବା ପାଇଁ କାମ ଚାଲିଛି। ତେବେ ଚାରଧାମ ଯାତ୍ରା ମାର୍ଗ ବର୍ତ୍ତମାନ ଖୋଲା ରହିଛି ଏବଂ ପ୍ରଶାସନ ପରିସ୍ଥିତି ଉପରେ କଡ଼ା ନଜର ରଖିଛି।