ତିନୋଟି ସମର୍ପିତ କେମିକାଲ୍ ପାର୍କ ସ୍ଥାପନକୁ CCEAର ମଞ୍ଜୁରି; କେନ୍ଦ୍ର-ରାଜ୍ୟ ମିଳିତ ସହଯୋଗରେ ହେବ କାର୍ଯ୍ୟକାରୀ ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଆର୍ଥିକ ବ୍ୟାପାର ସମ୍ପର୍କିତ ମନ୍ତ୍ରିମଣ୍ଡଳ କମିଟି (CCEA) ବୈଠକରେ ‘ଭବ୍ୟ-ରସାୟନ (BHAVYA-Rasayan)’ ଯୋଜନା ଅଧୀନରେ ଦେଶରେ ତିନୋଟି ସମର୍ପିତ କେମିକାଲ୍ ପାର୍କ ସ୍ଥାପନକୁ ମଞ୍ଜୁରି ଦିଆଯାଇଛି। ଏହି ଯୋଜନାର ମୋଟ ଆର୍ଥିକ ବ୍ୟୟ ୩,୦୩୦ କୋଟି ଟଙ୍କା ରହିଛି। କେନ୍ଦ୍ର ଓ ରାଜ୍ୟ ସରକାରଙ୍କ ସହଯୋଗରେ ବିକଶିତ ହେବାକୁ ଥିବା ଏହି ପାର୍କଗୁଡ଼ିକରେ ଶିଳ୍ପ ପାଇଁ ଆଧୁନିକ ‘ପ୍ଲଗ୍-ଆଣ୍ଡ-ପ୍ଲେ’ ଭିତ୍ତିଭୂମି, ସାଧାରଣ ସୁବିଧା ଓ ପରିବେଶ ପରିଚାଳନା ବ୍ୟବସ୍ଥା ଉପଲବ୍ଧ କରାଯିବ। ସରକାରଙ୍କ ମତାନୁସାରେ, ଏହି ପଦକ୍ଷେପ ଦେଶର ରାସାୟନିକ ଉତ୍ପାଦନକୁ ସୁଦୃଢ଼ କରିବା, ଆମଦାନି ନିର୍ଭରଶୀଳତା ହ୍ରାସ କରିବା, ନିବେଶ ଆକର୍ଷଣ, ରୋଜଗାର ସୃଷ୍ଟି ଏବଂ ଭାରତକୁ ବିଶ୍ୱସ୍ତରୀୟ ରାସାୟନିକ ଉତ୍ପାଦନ କେନ୍ଦ୍ର ଭାବେ ଗଢ଼ି ତୋଳିବାରେ ସହାୟକ ହେବ।